Depaul School Exam -SSLC

മാരത്തോൺ ഓട്ടം കാണുമ്പോൾ ഇന്ത്യക്കാർ അതിൽ പങ്കെടുക്കുന്നുവെന്ന് കരുതുക. അവർ ആദ്യം മുതൽ മദ്ധ്യത്തിൽ ഒരു സ്ഥാനം പിടിക്കും. അതുപോലെ സ്കൂളിൽ പഠിക്കുമ്പോൾ ആദ്യ പത്തിൽ എവിടെയെങ്കിലും ഞാനും സ്ഥാനം പിടിക്കും. മാരത്തോണിൽ അവസാനം കെനിയക്കാർ തന്നെ ഒന്നാം സ്ഥാനം നേടും. ഇന്ത്യക്കാർ അവസാന ലാപ്പിൽ ഓടി ക്കയറുമെന്നു  നമ്മൾ ചിന്തിക്കും, അത് പോലെ എന്റെ മമ്മിയും ചിന്തിച്ചു കാണണം. കെനിയക്കാരെപ്പോലെ മധുവും അശ്വിനും ഷീമയും അവരുടെ ആദ്യ സ്ഥാനങ്ങൾ നിലനിർത്തി. ആ മാരത്തോൺ അങ്ങനെ കഴിഞ്ഞു. അബ്ദുൽ അവസാന ലാപ്പിൽ ഓടി മുന്നിൽ കയറി. പക്ഷെ കെനിയക്കാരെ വെട്ടിച്ചില്ല. എങ്കിലും ചില രഹസ്യ വാശികൾ അബ്ദുൾ  ആ മരത്തോണിൽ നാലാം സ്ഥാനത്തോടെ ഓടി തീർത്തു. ഞാൻ പത്തിൽ നിന്നും പുറത്തു പോയി. ഭാഗ്യം കൊണ്ട് ഡിസ്റ്റിങ്ഷൻ എന്ന പദവി നേടി. മാർക്ക് ലിസ്ററ് തരുമ്പോൾ  ഓസ്റ്റിൻ മാസ്റ്റർ ദേഷ്യപ്പെട്ടത് ഞാൻ ഓർക്കുന്നു.

തൊടുപുഴ ഡീപോൾ

1991 - 92 പത്താം ക്ലാസ് കാലഘട്ടം;ചൂണ്ടൽ ഡീപോൾ സ്കൂൾ. ഞങ്ങളുടെ സ്കൂളിന്റെ പ്രിൻസിപ്പൽ ജോർജ്ജ് അച്ചൻ എപ്പോഴും 'തൊടുപുഴ ഡീപോൾ തൊടുപുഴ ഡീപോൾ’ എന്ന് പറഞ്ഞുകൊണ്ടിരിക്കും. അവിടെ നൂറ് കുട്ടികളുണ്ടെങ്കിൽ നൂറ് പേരും ഫസ്റ്റ് ക്ലാസ് വാങ്ങിക്കും. അതിൽ തന്നെ അമ്പത് ശതമാനം പേർക്ക് ഡിസ്റ്റിങ്ഷൻ. ഞങ്ങളുടെ സ്കൂൾ തുടങ്ങി അധിക കാലമായിട്ടില്ല. പത്താം ക്ലാസ്സിൽ ആകെ 53 കുട്ടികൾ. തൊടുപുഴയുടെ വിജയ ശതമാനം പല തവണ പറയുമ്പോൾ , ചിലപ്പോൾ എന്റെ മനസ്സിൽ ഞാൻ പറയും "അച്ചനും അച്ചന്റെ തൊടുപുഴയും …" എന്തായാലും അച്ചൻ പറഞ്ഞതിന്റെ  അമ്പത് ശതമാനം ഞങ്ങൾ ഫസ്റ്റ് ക്ലാസ് വാങ്ങിച്ചു. അച്ചൻ ഭയപ്പെട്ടപോലെ  ആരും തോറ്റില്ല.  പിന്നീട് എപ്പോഴോ ഒരു തൊടുപുഴ ഡീപോൾ സ്കൂൾകാരനെ കണ്ടപ്പോൾ ഞാൻ പറഞ്ഞു , "ഞാനും ഡിപോളിൽ ആണ് പഠിച്ചത്. ചൂണ്ടലിൽ ആണ് തൃശൂർ..." തൊടുപുഴ ഡീപോൾ കാരന്റെ തലയിലേക്ക് ഞാൻ സൂക്ഷിച്ചു നോക്കി. "അവന്റെ തലയിൽ കൊമ്പൊന്നും ഇല്ല…"  മഹേഷിന്റ പ്രതികാരം സിനിമയിൽ തൊടുപുഴയിലെ ഒരുത്തന്റെ മുഖത്ത് ഫഹദ് ഫാസിൽ അടിച്ചത് നന്നായി.