ഡൽഹിയിൽ നിന്നും അവൾക്കായി ഒരു റോസാപ്പൂ

വൈറ്റ്‌ഫീൽഡ് ടെക്നോപാർക്ക് വർഷം, 2002. പതിവില്ലാതെ ഡൽഹിയിൽ നിന്നും ഒരു ഫോൺകാൾ. ഡൽഹിയിൽ നിന്നാകുമ്പോൾ അതിന്റെ പ്രാധ്യാനം ഞാൻ നിങ്ങളോട് പറയേണ്ടതില്ലല്ലോ. എനിക്ക് അവന്റെ ചില നിർദ്ദേശങ്ങൾ ലഭിച്ചു. "താഴെ ഒരു പൂക്കടയുണ്ട്.  അവിടെ നിന്ന് ഒരു റോസാപൂവ് വാങ്ങിക്കണം. അത് നീ അവളുടെ ഡെസ്കിൽ ആരും കാണാതെ കൊണ്ട് വെക്കണം." അവളിരിക്കുന്ന വഴിയിലൂടെ സ്ഥിരമായി നടക്കുന്നതുകൊണ്ട് ഒരു റോസാപ്പൂ കൊണ്ടുവെക്കുക അത്ര ബുദ്ധിമുട്ടില്ലെന്ന് എനിക്കറിയാം. എന്നാലും ഡൽഹിയോട് ഞാൻ ചോദിച്ചു "അത് വേണോ…" ഡൽഹി പറഞ്ഞു "നീ അല്ലാതെ ആര് പൂ കൊണ്ടുവെച്ചാലും എന്റെ പദ്ധതി പാളും." ഡെസ്കിൽ പൂ വെച്ചിട്ട് ഞാൻ അവളുടെ പ്രേമത്തിൽ കുടുങ്ങുമോ എന്ന സംശയം ഡൽഹിയോട് അവതരിപ്പിച്ചു. ഡൽഹി ഉറപ്പു തന്നു. "നിന്നെ അവൾ ഒരിക്കലും സംശയിക്കില്ല." കാലത്ത് പത്തരയ്ക്ക് അവൾ ജോലിക്കെത്തി. ഡെസ്കിൽ റോസാപ്പൂ കണ്ട അവൾ അത്ഭുതപ്പെട്ടു. ശരീരം ശ്രദ്ധിക്കാതെ ഒരു വർഷമായി 16 മണിക്കൂർ ദിവസം ജോലി ചെയ്യുന്ന കുറെ ചെറുപ്പക്കാർ ചുറ്റുമുള്ള ഓഫീസ്. പ്രേമത്തിന്റെ ഒരു കണികപോലും ആരുടേയും മുഖത്ത് കാണാൻ സാധ്യമല്ല.  അവിടെ ഒരു റോസാപ്പൂ വെക്കാൻ സാധ്യതയുള്ള ആരെയും പെൺകുട്ടിക്ക് ആലോചിക്കാൻ കഴിഞ്ഞില്ല. അത്രയധികം ടെൻഷൻ എല്ലാവരുടെയും മുഖത്ത് പ്രകടമാണ്. ആ കുട്ടി ആലോചിച്ച് ഉത്തരത്തിൽ എത്തി. നേരെ എന്റെ അടുത്ത് വന്നു. റോസാപ്പുവിനെ കുറിച്ച് എന്നോട് ചോദിച്ചു. ഞാൻ അവളുടെ നേരെ കയർത്തു. "കുട്ടിയോട് എനിക്കെന്തങ്കിലും പറയാനുണ്ടെങ്കിൽ അത് നേരെ പറയാൻ എനിക്കറിയാം. അല്ലാതെ ഈ വക റോസാ തട്ടിപ്പിന് എന്നെ കിട്ടില്ല." ഇത് കേട്ട അവൾ നിരാശയോടെ തിരിച്ചു പോയി. പക്ഷെ അവൾ വിട്ടില്ല. 10 മിനിറ്റ് കഴിഞ്ഞു അവൾ വീണ്ടും എന്റെ അരികിൽ വന്നു "താൻ പൂവെച്ചു എന്നല്ല ഞാൻ പറഞ്ഞത്…" മുഖത്തെ ഗൗരവ ഭാവം വിടാതെ ഞാൻ ചോദിച്ചു  "പിന്നെ…"  അവൾ തുടർന്നു "ഇതാരാവാം ഇവിടെ വെച്ചത്…."  ഞാൻ ചിന്തയിൽ മുഴുകി "ഇത്രയും ജോലി തിരക്കിനിടയിൽ റോസാപ്പൂ വെക്കാൻ മാത്രം വട്ടുള്ള.."